【#MyHolyTreasure Vol.014《Air Dior》】
@thevierchueng: 時間地點係2001年嘅香港某一個下午，家母聽過電話後說她朋友有多一張票說過幾個鐘後帶我去看演唱會，我一個人坐的士去到紅磡，喺紅館門口等嗰位大哥哥，第一次睇演唱會，嗰次亦係我第一次唔洗隔住收音機聽陳奕迅唱歌。仲係小學生嘅我只識一首歌叫《Shell We Talk》，啊媽個friend問我啲歌未聽過會唔會好悶，我話：「唔會悶，佢著衫都幾有型吖！」。細路就係咁，講嘢九唔搭八，從來唔會認衰仔認自己唔識啲乜。時間地點係2012年4月嘅倫敦，陳奕迅喺英國倫敦成為第一個在O2 Arena開演唱會嘅華人，讀緊書嘅我再次被另一位髮型師大哥哥帶去睇佢嘅演唱會，而喺演唱翌日，行緊街嘅時候喺Selfridges門口撞到陳生本尊，同行朋好想同佢影張相但唔敢問，我Say個Hello後幫口問句可以影張合照嗎？陳奕迅伸出右手，見狀下我也自然都伸出手握埋去，佢話:「唔好意思我唔影相，但我地握過手留念吧！，咦你隻手咁寒嘅～」。離開後朋友們都對野生捕獲陳奕迅但無得相影而大感失望，個個都話原來佢真人同娛樂版講嘅一樣咁「串」，而只係幫人問其實無心集郵嘅我就無啦啦同歌神握咗下手，我心諗，其實佢大可以Reject完就走人，肯同歌迷握個手其實都幾Gentleman又窩心囉。 時間地點係兩個星期前周末嘅上環普慶坊，我坐在公司門口飲住最近愛上嘅Matchali嘆住枝回魂煙。街頭有㗎車駛過嚟，車上面嘅司機帶著笑容地望住我，嗰日冇帶眼鏡嘅我其實睇遠嘢會化化哋，所以應該係無咩表情未懂反應，架車去到街尾再轉翻出嚟嘅時候喺我面前停咗下，司機笑騎騎揮手Hello，抬頭一望原來係陳奕迅，我尷尬又驚訝地立即笑著點頭，回神後才發現自己差點便因為冇戴眼鏡而黑咗歌神一吓面。(其實陳生係依幾年經隔離舖頭嘅大哥哥介紹所認識，一點也不能稱得上「熟」，似係街坊囉。）時間地點係上個星期，在家中看著陳奕迅最新的慈善演唱會。在網上有人會話佢唱功大不如前，有人會話佢唱錯歌詞，有人話佢份人臭串，有人話佢亂嚟⋯下刪千百個「有人話」。世界就是這樣，人總是活在個人嘅幻想和遍見裏頭，其實千萬個網上網下嘅「有人」之中到底有幾多人喺現實世界又確實認識佢哋口中嘅另一個人呢？道聽而塗說，德之棄也，螢光幕中嘅陌生又親切的陳奕迅，他還是那個能令你在百忙中抽空坐定聽佢演唱會嘅人 (就算不是入場睇)，衣著和身型看似隨意但依舊有型。如你和我的想法一樣，相信你血液中也帶著幾分Holy仔的基因，我們應該能交個朋友！就如購物一樣，最近屬熱門話題的Air Dior，有人會話冰㡳設定不「值租」，有人會話炒到咁貴要錢唔要貨好過，有人會話有價無市，有人會話灰色嘅Air Jordan 1 Mid都扮到啦，有人會話有好多「流叉」。耳聽三分虛，眼見未為真，凡事著過用過親身感受過才好相信吧！ …
